يا عمري كان العشم أكبر

في فترة من الفترات عام 2001 تعرفت على فن الكسرات وقررت أكتب عليه وبنفس أسلوبه

ول يا قمر وش جرى مني…
وش فيك كنك مزاعلني…
حتى النظر ما تناظرني
يا حبي كان العشم أكبر
اشوفك اليوم تتغلا…
وتزيد في علتي علا…
تطعن بقلبي وتتسلا
يا سيدي كان العشم أكبر
والله ماذكر بيوم اخطيت…
حتى بغيابك اذا قفيت…
بالعكس غيرك ترى ما اغليت
يا عمري كان العشم أكبر
انته حياتي وكل الناس…
مالك فؤادي مع الاحساس…
بالقلب لك وقفه ومجلاس
يا قلبي كان العشم أكبر
تدري بنفسي وماجاها…
من يوم حبك تولاها…
زادت مع الهم شكواها
يا حبي كان العشم أكبر
ساعات بعدك شقا عمري…
ولحظات قربك هناء تدري…
حبك يسيطر على أمري
يا سيدي كان العشم أكبر
في كل وقتي عليك اشتاق…
حتى ولو هي ثواني افراق…
فكري على شوفتك ينساق
يا حبي كان العشم أكبر
مايكفي اني احبك موت…
والا تبيني اصيح بصوت…
فرقاك صعبه ويهون الموت
يا قلبي كان العشم أكبر
اليا لمحتك مع الشارع…
قلبي وعيني لك تطالع…
تامر وانا لامرك الطايع
يا عمري كان العشم أكبر
واقول كلك علي تمون…
قدامك العاشق المجنون…
اللي غدا بشوفتك مفتون
يا حبي كان العشم أكبر
تضحك وتلعب باعصابي…
وانا معذب ومنصابي…
جرحي من العام ما طابي
يا قلبي كان العشم أكبر
من بعد ما اسكنتك بروحي…
وادميت لعيونك جروحي…
اصبحت للعاذله توحي
يا سيدي كان العشم أكبر
لا تهدم الحب في لحظات…
وتصدق بخلك الهرجات…
ما هكذا توصل الهقوات
يا عمري كان العشم أكبر
اول حبيبك وقاهرهم …
دايم بجنبي وتاركهم …
واليوم شكلك تطاوعهم
ياحلو كان العشم أكبر
ما دمت فاهم وانا فاهم…
لحظة دقايق ونتفاهم…
يمكن حبيبي علي واهم
يا خلي كان العشم أكبر
ارحم فؤادي وقول شفيك…
عطني علومك وانا باعطيك…
ريح حبيب مولّع فيك
يا هوووه كان العشم أكبر