هذي بيتين يتيمه كتبتها بعد انقطاع 5 سنوات عن كتابة القصيد وما كتبت بعدها شي

هذاك يوم إن الغلا بيننا حي
يوم الوفاء موجود بقلوب عشاق
رح.. لا تعذر ما بقى لك ولا شي
لا عين تدمع لك.. ولا قلب يشتاق

2009م

اليا ذكرنا الطيب كنا ذكرناك
خالد وذكرك خالد بصفحة الطيب
كل المراجل شامخه في مزاياك
وكل العلوم الطيبه والمواجيب
منك الكرم وأصله عريق بيمناك
لاجاك ضيفك جيت كلك تراحيب
وان جاك محتاجٍ نصيته اليا جاك
تعطيه لو ما عندك الا من الجيب
وفزعتك معروفة لمن صاح ينخاك
ماخاب من ينخاك ماظنه يخيب
ماهو غريبٍ منك لا شاع ذكراك
ساسك من اللي يعشقون المحاريب
نسل الرجال اللي لهم علم وادراك
أهل الكرم وأهل الوفاء مابهم عيب
لو حاول النمام بالهرج واطراك
يعجز يدور في طباعك عذاريب
مثل الجبال الشامخه لاعدمناك
هذا شموخك مع صعاب التجاريب
ومثل المطر تسقي ولو ماحدٍ اسقاك
تروي ديارٍ ضامية قاع وشعيب
ومثل النجوم الساطعه طالع هناك
نجمك تميز من فعولٍ كما الذيب
ياخالد أعجزت القصايد بممشاك
وشلون وانت اللي رقى قمة الطيب

2004 م

الـلـيـالـي فـي خـيـالي كلها بالبارحه
مـا تـذكـرت الـلـيالي لكن الذكرى تعود
مـن مغيب الشمس حتى جات يمي سارحه
بـيـن جـفت في غيابك والبشاير بالرعود
تـنـتظر مني الصراحه والمشاعر واضحه
مـن عرفتك وانت غالي فوق عن كل الحدود
اشـتـيـاقـي واقترابك من خواطر جامحه
والـقـصايد واغترابي وقت بعدك والصدود
ومـن هـيـامي في كلامك والعيون الذابحه
والـتـلـعـثم في كلامي والرسايل والردود
ومـن سلامي في حضورك لك عيوني لامحه
ومن سلامك في حضوري شي واضح للوجود
الـعـواذل تـتـهـمـني والقضيه ناجحه
حـب واضـح ما يبي له لا دليل ولا شهود
مـا بـقـا فـيـني كلام وكل سترٍ فاضحه
الـغـلا مـا هـو بـكيفي والبلا حبه يزود
جـيـت من درب المنايا والصقور الجارحه
وجيت من صوت الكناري والنسايم والورود
جـيـت كـلي من جروحي والهقاوي رايحه
جـيت عنده مع طموحي والغناوي والوعود
ورحـت بـاذيال الهزيمه ما قدرت اصارحه
لا ارتـمـى يمي بشوق ولا رماني للجحود
2003م

الـلـيـل ما يقسى على قلب محزون
والـصـبح من نوره حكى لي حكاية
عـشـنا وشفنا من غرابيل وشجون
بـس الـمـهـم اللي ضحك بالنهاية
الـحـب مابه غير لوعات وطعون
والـذكـريـات اللي بقت من شقايه
وشـخص تناسى ناس ما يوم ينسون
ونـاسٍ لـهـم بـالناس الفين غاية
وحـقـدٍ قـديم وحب غالي ومدفون
وصـوت تـلـعـثم ما يردد صدايه
وطبع الجفا من قلب ما اخبره يخون
وصـيت الوفاء في قلب قاسي وتاية
وفرحة دموع اللي على الحزن مفتون
وعـمـر يـمـر ومـاذكرنا البداية
وغربة تصير لجاحد المعرفة عون
وخـلٍ يـصـدق كل كذب الوشاية
وبـحـر شكا كنه من الوقت مغبون
مـن كـثـر ما يسمع هموم وشكايه
وصـحراء تشفق كل ما قالوا مزون
ووجـه تـخـفا تحت وجه المراية
وحـلـمٍ تـحقق بعد ما ماتت عيون
وعـيـنٍ تـقـول الليل يفهم بكايه
وشـعـرٍ يـغنى به طواريق ولحون
وصـدر يـقول القى بشعري دوايه
نـشدت صبحي وانتهى باسود اللون
ضـاع الجواب وصار لغز الحجاية
هـذي الـنـهايه من بدايات مطعون
أضـحـك ولا كـني فهمت الحكاية
2003م

حـبـيـبي لا الوهم عشته ولا مت بغرابيلك
ولا حـدتـنـي الـدنـيـا على شيٍ يبكيني
تـرى مـن حزة غيابك وانا ناسي مواصيلك
عـزيـز الـنفس ما تقدر ولو لحظه تعنيني
تـقـول انـك مـعذبني واقول بعيد ياحليلك
بـعـيـدٍ عـنـك يالجافي تغربني وتشقيني
أنـا لـي خـاطـرٍ يـقسا بعد حبك وتدليلك
وانـا لـو رحـت للغربه ادل ارجع عناويني
وأنـا لـو ذقـت حـرمانك ومرتني مواويلك
اصـد وابـتـسـم لـلـي مع الايام ناسيني
وأنـا لو ملت باحساسي وصار يروح ويجيلك
أعرف شلون تلعب بي وأعرف شلون تغليني
أمـيـز بـيـن حرمانك وجرحٍ من فراقي لك
وأعرف اللي تشمت بي واعرف اللي يواسيني
أحـب بـصـدق لـكني اذا صديت ما اجيلك
ولا اتـعـب عـلى شانك اذا شفتك تجافيني
أبـادل بـالـجـفـا طبعك ولا يمكن اناديلك
وأنـاجـي بـالـغلا عصفور لا غرد يناديني
اذا حـب الـبـشـر اعمى فلا تفرح بتحليلك
انـا مـا يـنـعـمي قلبي اذا عقلي يقديني
واذا قـصدك قصيدي فيك وشي من كلامي لك
فـانـا شـاعر وقالوها اهيم بعكس ما فيني
كـتـبـت الشعر من قبلك وزدته من تعاليلك
وصـارت دفـتـر الذكرى كلامٍ في دواويني
تـعـلـمت الوفاء منك وصدق الليل من ليلك
وتـعلمت الجفا بعدك وكذب الصبح في عيني
لا وضـح ولا فـسـر ولا ودي بـتـعـليلك
غـيـابـك شي جربته وصار بماضي سنيني
2003م

تـوك تجي ما عاد لي فيك حاجة
قـلـبي تعود من كثر ما جرحته
طـعم الحلا بعد المرارة سماجه
والـقرب ما ينفع وبعدك عشقته
جـرحٍ قـديـم ومستحيلٍ علاجه
هـديـتـك يوم الغلا لك ذخرته
وشـلون يرجع للخفوق ابتهاجه
والـهم في وسطه يزود وكتمته
ان قـلت أبسلى ما تعدل مزاجه
وان قـلت أبنسى لو دقيقه ذكرته
وان قلت أبقسى ما قويت لعجاجه
هـذا خـفوقي بعد رحت وتركته
حـطمت حبك مثل كسر الزجاجه
وصعب عليك ترجّع اللي كسرته
درب الـفراق اليوم فيه انتواجه
نفس المكان اللي رحلت وهجرته
حتى المكان أعلن عليك احتجاجه
يـاكيف تبني صرح بيدك هدمته
خـلاص مـا باقي ولا أي حاجة
أحـرقـت ذكراك وغرامك دفنته
2003م

يـامـن غدا يروي بعد صكة الباب
اقـفـى ولا رد اعـتـبـار لخفوقي
صـد وتـغـاضى وأتبع غياب بغياب
مـا كـنـه اللي ساريٍ في عروقي
ولا كـنه اللي صار لي كل الأحباب
وأجـمـل سنيني وانشغالي وذوقي
ولا كـنـه اللي مسهرٍ جفن وأهداب
لأجـله سهرت الليل حتى الشروقي
ولا كـنـه اللي جارحٍ قلب منصاب
كـلـه هـمـوم وزادها بالحروقي
ولا كـنـه الـلي بالغلا قال لي ذاب
وانـه عـلى حبي حريص وصدوقي
كـم كـنت أناجي ليلتي بوح وعتاب
وكـم كـنت أسامر خاطرٍ ما يروقي
ان قـال ويـنه قلت موجود ما غاب
دايـم عـلـى طاري غرامه شفوقي
مـن غيبته والجرح بالقلب ما طاب
أكـتـب قـصايد في غيابه وشوقي
حتى غدا جرحي وشعري لي أصحاب
ان صـاح جرحي ترجمت له طروقي
يـامـن رحل عني بلا ذنب واسباب
ارجـع ولانـي نـاشدك عن حقوقي
2003م