الـلـيـل ما يقسى على قلب محزون
والـصـبح من نوره حكى لي حكاية
عـشـنا وشفنا من غرابيل وشجون
بـس الـمـهـم اللي ضحك بالنهاية
الـحـب مابه غير لوعات وطعون
والـذكـريـات اللي بقت من شقايه
وشـخص تناسى ناس ما يوم ينسون
ونـاسٍ لـهـم بـالناس الفين غاية
وحـقـدٍ قـديم وحب غالي ومدفون
وصـوت تـلـعـثم ما يردد صدايه
وطبع الجفا من قلب ما اخبره يخون
وصـيت الوفاء في قلب قاسي وتاية
وفرحة دموع اللي على الحزن مفتون
وعـمـر يـمـر ومـاذكرنا البداية
وغربة تصير لجاحد المعرفة عون
وخـلٍ يـصـدق كل كذب الوشاية
وبـحـر شكا كنه من الوقت مغبون
مـن كـثـر ما يسمع هموم وشكايه
وصـحراء تشفق كل ما قالوا مزون
ووجـه تـخـفا تحت وجه المراية
وحـلـمٍ تـحقق بعد ما ماتت عيون
وعـيـنٍ تـقـول الليل يفهم بكايه
وشـعـرٍ يـغنى به طواريق ولحون
وصـدر يـقول القى بشعري دوايه
نـشدت صبحي وانتهى باسود اللون
ضـاع الجواب وصار لغز الحجاية
هـذي الـنـهايه من بدايات مطعون
أضـحـك ولا كـني فهمت الحكاية
2003م

حـبـيـبي لا الوهم عشته ولا مت بغرابيلك
ولا حـدتـنـي الـدنـيـا على شيٍ يبكيني
تـرى مـن حزة غيابك وانا ناسي مواصيلك
عـزيـز الـنفس ما تقدر ولو لحظه تعنيني
تـقـول انـك مـعذبني واقول بعيد ياحليلك
بـعـيـدٍ عـنـك يالجافي تغربني وتشقيني
أنـا لـي خـاطـرٍ يـقسا بعد حبك وتدليلك
وانـا لـو رحـت للغربه ادل ارجع عناويني
وأنـا لـو ذقـت حـرمانك ومرتني مواويلك
اصـد وابـتـسـم لـلـي مع الايام ناسيني
وأنـا لو ملت باحساسي وصار يروح ويجيلك
أعرف شلون تلعب بي وأعرف شلون تغليني
أمـيـز بـيـن حرمانك وجرحٍ من فراقي لك
وأعرف اللي تشمت بي واعرف اللي يواسيني
أحـب بـصـدق لـكني اذا صديت ما اجيلك
ولا اتـعـب عـلى شانك اذا شفتك تجافيني
أبـادل بـالـجـفـا طبعك ولا يمكن اناديلك
وأنـاجـي بـالـغلا عصفور لا غرد يناديني
اذا حـب الـبـشـر اعمى فلا تفرح بتحليلك
انـا مـا يـنـعـمي قلبي اذا عقلي يقديني
واذا قـصدك قصيدي فيك وشي من كلامي لك
فـانـا شـاعر وقالوها اهيم بعكس ما فيني
كـتـبـت الشعر من قبلك وزدته من تعاليلك
وصـارت دفـتـر الذكرى كلامٍ في دواويني
تـعـلـمت الوفاء منك وصدق الليل من ليلك
وتـعلمت الجفا بعدك وكذب الصبح في عيني
لا وضـح ولا فـسـر ولا ودي بـتـعـليلك
غـيـابـك شي جربته وصار بماضي سنيني
2003م

تـوك تجي ما عاد لي فيك حاجة
قـلـبي تعود من كثر ما جرحته
طـعم الحلا بعد المرارة سماجه
والـقرب ما ينفع وبعدك عشقته
جـرحٍ قـديـم ومستحيلٍ علاجه
هـديـتـك يوم الغلا لك ذخرته
وشـلون يرجع للخفوق ابتهاجه
والـهم في وسطه يزود وكتمته
ان قـلت أبسلى ما تعدل مزاجه
وان قـلت أبنسى لو دقيقه ذكرته
وان قلت أبقسى ما قويت لعجاجه
هـذا خـفوقي بعد رحت وتركته
حـطمت حبك مثل كسر الزجاجه
وصعب عليك ترجّع اللي كسرته
درب الـفراق اليوم فيه انتواجه
نفس المكان اللي رحلت وهجرته
حتى المكان أعلن عليك احتجاجه
يـاكيف تبني صرح بيدك هدمته
خـلاص مـا باقي ولا أي حاجة
أحـرقـت ذكراك وغرامك دفنته
2003م

يـامـن غدا يروي بعد صكة الباب
اقـفـى ولا رد اعـتـبـار لخفوقي
صـد وتـغـاضى وأتبع غياب بغياب
مـا كـنـه اللي ساريٍ في عروقي
ولا كـنه اللي صار لي كل الأحباب
وأجـمـل سنيني وانشغالي وذوقي
ولا كـنـه اللي مسهرٍ جفن وأهداب
لأجـله سهرت الليل حتى الشروقي
ولا كـنـه اللي جارحٍ قلب منصاب
كـلـه هـمـوم وزادها بالحروقي
ولا كـنـه الـلي بالغلا قال لي ذاب
وانـه عـلى حبي حريص وصدوقي
كـم كـنت أناجي ليلتي بوح وعتاب
وكـم كـنت أسامر خاطرٍ ما يروقي
ان قـال ويـنه قلت موجود ما غاب
دايـم عـلـى طاري غرامه شفوقي
مـن غيبته والجرح بالقلب ما طاب
أكـتـب قـصايد في غيابه وشوقي
حتى غدا جرحي وشعري لي أصحاب
ان صـاح جرحي ترجمت له طروقي
يـامـن رحل عني بلا ذنب واسباب
ارجـع ولانـي نـاشدك عن حقوقي
2003م

ما قلت لك ماطار طيرٍ  وارتفع
الا كما طار وتحداني يطيح
مردك لدربي تجيني مقتنع
نادم وضايع وبجناحينك جريح
آسف حبيبي ماني قادر أستمع
كل الكلام اللي تقوله ما يبيح
كان الخطا أكبر من انّا نجتمع
ونوضح الغلطه ونرجع للصحيح
دامك تجاهلت بغرورك مجتمع
واصبحت عاشق للمظاهر والمديح
وش لك بطيرٍ لا يطير ولا وقع
عايش حياته ما قرب درب المطيح
لا تحسبني في رجوعك با ندفع
اصلا نسيتك وانتهى وقتٍ شحيح
ما قلت لك خل التعالي والدلع
هذا انت مكسور الجناحين وطريح
2003م

البحر بالموج هايج وانت في بطن السفينة
لا غرق نصف السفينه وش بقالك فـ الحياه
لـو عرفت ان الركاده والعقل بالناس زينة
مـا تـورطت بـمشاكل حـلّها حظ النجاه
مـا نـدمت الا بعد ما وسدك فعلك غبينة
وانـهدم حـلمٍ بـنيته فوق راس اللي بناه
لـو تـعلمت الإرداة والـقناعة والسكينة
واستشرت العاقل اللي ينصحك باللي لقاه
وابـتديت الـخطوه اللي مقتنع فيها متينة
لـلطموح ولـلأماني درب كـلٍ قـد مشاه
لا تـقول انك حزين ودنيتك صارت حزينة
قـدر الـمكتوب ربك والله أعلم في عطاه
اطلـب الله في صلاتك وابتعد عن كل شينة
كـمّل الـمشوار كـنك ما عثرت بمبتداه
بالأمل عيش بحياتك وأطلق النفس السجينة
مـن مـشى فـي درب يلقى ما بغاه بمنتهاه
لا تـردد فـي مـكانك تحسب همومٍ دفينة
كـل ما فات وتعدى وش تبي به وش وراه
مـا مضى لك من تجارب خلها عندك خزينة
الـخطأ درب الـصواب وكـلٍ يحدد خطاه
لـو تذكرت بزمانك مـا جرى لك في سنينه
ما ندمت وقلت حظي من عرفـته في رداه
لا تـقول الحظ عاثر وأنت في ذيك السفينة
قـول أنـا كيف أتعلم وأسبح لشط الحياة
2003م

طال الغياب وجيتك اسأل عن الحال
ولـولا الـغلا يـاصاحبي ما تعنيت
كـني لـمحتك تـرتجي لحظة وصال
أو طـيفك اللي مرني يومك ابطيت
شـوقي حـداني لك غريبٍ ورحال
ودي ولا ودي اشـوفك تـسليت
مـدري تـذكرنا ودايم على البال
والا نـسيت الناس يوم انك اقفيت
والا تكبـرت بـغيابك وتـختـال
والا تـثاقلت الـسؤال وتـناسيت
والا ضـحية هـرجة القيل والقال
والا بـعد مـا صرت غالي تغليت
والا تـبي تـجرح ضـميري بموال
دامـك عـلى جرح الاوادم تغنيت
هـذاك انـا والـليل للهم مرسال
ودمـعة قـلم ترثي علي لا تشكيت
فـيني مـن الـبدوان عزه وترحال
جيتك من الذكرى حروف وعفاريت
وفـيني وفـاء يسمع به الفين رجال
واقـسا لـيا منك قسيت وتماديت
ذكـرى قديمه واشغلت بالي اشغال
فـيها عـهود ودمـعتين وتناهيت
2003م

أنـت وضميرك ما بقى شي خافي
وش عاد باقي ما وضح في هوانا
أتـعبت لـك شعري بكل القوافي
وأهـديت لـك قـلبي بداية غلانا
وأسـهرت لك عيني بليل الخوافي
وأدمـيت لـك جرحي لساعة لقانا
مـاظن شـيٍ بـيننا مـا يشافي
نـفس الـشعور اللي تلعثم وجانا
أنـت الحبيب وبينهم صرت وافي
واحـساس خافي واضحٍ في وفانا
جمر الغلا رمّـد وصمتك جفافـي
وش تـنتظر والحب ضاوي سمانا
ذيـك السنين الماضيه وانت غافي
لـو طـوّلت مـا مات حبٍ غشانا
بـس الـبلا قـربك ومرّات جافي
لا انت القريب ولا انت منهو جفانا
أحـيان اشوفك جيت بالحب ضافي
وأحـيان اشوف الصد فجأه غزانا
أنـت وضـميرك سوقني للتجافي
والا تـعـال وقـولها لـعذلانا
2003م